چه‌ند شیعرێکی شاعیر قه‌هار شێخانی

---

شه‌وانی نیگه‌رانی

من کێم هەیە بێجگە لە تۆ
بۆم بسوتێ بە ئاسانى
بە دیار خەمم دابنیشێ
لە شەوانى نیگەرانى
* * *
شەو تا سەحەر هەر وەکو مۆم
پەنجەکانى داگیرسێنێ
ژوورى تاریکم ڕووناک کاو
هەناسەى شادیم بۆ بێنێ
* * *
لە دوورى تۆ من هەمیشە
وا خەمى خۆم ئەخۆمەوە
بە ڕۆژگارى ڕەش و شومى
ڕابردووى خۆم ئەڕۆمەوە
* * *
لەم غوربەتە دڵم تەنگە
شادى بەژینم نامۆیە
دیلى دەستى برینێکم
ئێجگار بە ئازار و سۆیە


10/3/2003

---

جه‌ژنانه‌

وەرە ئەم شەو هەناسەکەت
ئاوێزانى هەناسەم کە
ببە چەترى شادى دڵ و
خەمەکانم لەگەڵ بەشکە
***
زۆر هەوڵم دا بتدۆزمەوە
لە کونجێکى تاریکى شار
تا تێر لە باوەشت گرم
نەک هەرجارێ هەزاران جار
***
گوڵم کەى بۆم دادەبارێى
هەر وەکو ڕێژنە بارانێ
لە شەوێکى ئەنگوستە چاو
بەرێکەوت بێیتە ژوانێ
***
چەژنیش نەبێ بیکەیتە چەژن
بۆ ئەم دڵە پڕ لە ژانە
سەدان ماچى لێوى تەڕت
بۆ من بکەیتە چەژنانە



20/11/2003

---

چیرۆکی خه‌م

تەمەن کورت بوو گوڵى لاویم
لە ناکاودا لێم هەڵوەرى
هەورى ڕەشى وەرزى شادیم
بەبێ باران زوو تێ پەڕى
* * *
لە شەوانى یەڵداى تەمەن
ڕۆشناییەک بەدى ناکەم
کاروانى شادى جێی هێشتوم
هەرچەند دەکەم و پێى ئاگەم
* * *
تازە دەبێ هەروا بژیم
هەتا ماوم خەم بژمێرم
دوا نەمامى شادى دڵم
بە وەرزى پایز بسپێرم
* * *
کەسیش نیە بارى قورسى
ئەو خەمەم بۆ هەڵگرێ
لە تەنیایى من بڕوانێ و
گوێ لە ناڵەى دڵم بگرێ
* * *
بۆیە هەر خۆم کەزى درێژى
ئەو خەمەى خۆم ئەهۆنمەوە
هەردەم لە ڕەنگ و ڕووخسارم
چیڕۆکى خەم ئەخوێنمەوە

2/6/2003

---

لێت دانابڕێم
 

خۆشەویستیت وەک هەناسەم
بە ناخمدا شۆڕ بۆتەوە
بۆتە دڵۆپى خوێنى جەستەم
هەرگیز لێم جیا نابێتەوە
***
تۆ وەک نەمام لە کەنارى
دەریاى عەشقى من ڕواوى
بە نهێنى لەگەڵ هەست و
سۆزى دڵى من دواوى
***
لە هەر شوێنێ سەرنج بدەى
لەبەر دەمتام کڕنۆش ئەبەم
ڕۆژێ سەدجارحەزەکانم
لە ژێر پێتا لە خاچ ئەدەم
***
تا لێرەبى لە قەڵاوە
بانگى عەشقت ڕادەدێرم
هەموو شەوێ پەیامێکت
بە منارەدا بۆ ئەنێرم
***
کە چویتەوەش دڵنیابە
گوڵم لەوێش لێت دانابڕێم
شەوانە وەک مانگى چواردە
لە پشت گۆیژەوە بۆت هەڵد ێم

5/1/2004