ده‌ستپێک  :::  هۆنراوه‌  :::  هۆنراوه‌ به‌ ده‌نگ  :::  پۆسته‌ر  :::  ئێمه‌  :::  کتێبی هۆنراوه‌  :::  په‌یوه‌ندی

بارانی خۆزگه‌


-1-
خۆزگه‌ ئه‌بووم به‌ په‌پووله‌ و
باڵم ئه‌گرت،
ئه‌وسا ئه‌فڕیم و ئه‌هاتم
به‌ سه‌ر گوڵی ڕۆحی تۆوه‌
هه‌ڵئه‌نیشتم..
ئاوێزانی ڕۆحت ئه‌بووم،
تا تێر ئه‌بووم له‌ بۆنی
ڕۆح و هه‌ناسه‌ت
دوای ئاوێزانبوونی ڕۆحمان
ئه‌فڕیم ئه‌فڕیم
ماچبارانی ئه‌م به‌هه‌شتی
جوانییه‌م ئه‌کرد،
پڕ به‌ گه‌رووم گۆرانی عیشقم
ئه‌چڕی و
بۆ هه‌تایه‌ ئه‌موت نه‌فره‌ت
له‌ دووری و ته‌نیایی و غوربه‌ت..

-2-
خۆزگه‌ ئه‌مڕۆش وه‌کو دوێنێ
له‌ ئامێزی پڕ له‌ سۆز و
میهری تۆیا ئه‌بووم هاوڕێ
نه‌ک ته‌نیایی و حه‌سره‌ت و ژان
خۆزگه‌ ئه‌مڕۆش
خه‌نده‌ و شادییه‌کانی دوێنێ
ئاوێزانی ڕۆحم ئه‌بوو
نه‌ک خه‌م و فرمێسک و گریان..

-3-
خۆزگه‌ هاوڕێ
تۆش وه‌ک هه‌تاو
هه‌موو ڕۆژێ
له‌ گه‌ڵ سپێده‌ی به‌یانا
ئه‌هاتیت و
به‌رگی خۆشبه‌ختی و ئومێدی
ڕۆژێکی نوێت
به‌ به‌رمدا ئه‌کرده‌وه‌..
ئه‌وسا منیش وه‌کو ڕۆژگار
له‌ پێشوازی هاتنتدا
ئاسمانی ڕووخساری خۆمم
بۆ پرشنگی نیگاکانت ئه‌کرده‌وه‌..

-4-
خۆزگه‌ هاوڕێ
هه‌موو ساتێ
له‌ جێی یاد و ئه‌دگاره‌کان
خۆت ئه‌بووی به‌ میوان له‌ لام
ئه‌وسا منیش وه‌ک په‌روانه‌
به‌ ده‌وری شه‌معی ڕووی تۆیا
هێدی هێدی ئه‌خولامه‌وه‌
تا به‌ بێده‌نگی ئه‌سووتام..

-5-
خۆزگه‌ هه‌موو سپێده‌یه‌ک
تۆش وه‌ک ئاورنگ
به‌ نیانی ماچ پرژێنی
گه‌ڵاکانی عومری پڕ حوزنت ئه‌کردم،
ئه‌وسا منیش
له‌م به‌فرانباری خه‌مه‌دا
په‌ڕه‌ په‌ڕه‌ی گه‌ڵاکانی عومری خۆمم
ئه‌دایه‌ به‌ر ڕێژنه ‌بارانی
ماچی تۆ..

-6-
خۆزگه‌ هاوڕێ
هه‌موو شه‌وێ
له‌گه‌ڵ مه‌لی خه‌ونه‌کانما
تۆش ئه‌هاتی به‌ ئه‌سپای
به‌ سه‌ر چڵی خه‌یاڵمه‌وه‌
هه‌ڵئه‌نیشتی..
ئه‌وسا منیش ئازیزانه‌
ئامێزی پڕ میهری خۆمم
بۆ ئه‌کردی به‌ هێلانه‌..

-7-
خۆزگه‌ له‌ جێی
هه‌نسک و گریه‌ی شه‌وانه‌
چرپه‌ی هه‌ست و
هه‌ناسه‌ی تۆ
ئه‌ڕژایه‌ نێو هه‌ناومه‌وه‌..
ئه‌وسا منیش
فرمێسکی دووریم ئه‌سڕی و
به‌ ده‌م چرپه‌ و
نه‌رمه‌ هه‌ناسه‌کانته‌وه‌
وه‌ک شنه‌ی با ئه‌شنامه‌وه‌..

-8-
خۆزگه‌ هاوڕێ
هه‌موو ده‌مه‌ و ئێوارانێ
تۆش وه‌ک نه‌سیم
شه‌رمنانه‌..
به‌ سه‌ر باڵای ته‌نیایما
ئه‌شنایته‌وه‌
ئه‌وسا منیش
دنیای خه‌م و نائومێدیم
جێئه‌هێشت و
وه‌کو جاران..
به‌ ژوانی شادییه‌کان
شاد ئه‌بوومه‌وه‌..
 

گه‌لاوێژ حه‌مه‌ قادر